2024 жылдың 24 қазан күні Қазақстан Республикасының Республика күніне арналған Халықтар достығы мен мәдениет үйінде облыс әкімінің қатысуымен салтанатты іс-шара өтті. Бұл мерекелік шара еліміздің тарихы мен тәуелсіздігіне деген құрмет көрсету мақсатында ұйымдастырылды. Іс-шара барысында еліміздің әлеуметтік, мәдени және экономикалық дамуына елеулі үлес қосқан азаматтар мен азаматшалар марапатталды. Олар өз қызметтерімен халықтың ықыласына бөленіп, еліміздің дамуына зор әсерін тигізді.

Марапаттау рәсімі мерекелік концерттік бағдарламамен жалғасты. Кештің қонақтары Қазақстан Республикасының еңбек сіңірген әртістері Қыдырәлі мен Қарақат, сондай-ақ елімізге танымал әнші Қуандық Рахым, әлемге танымал этно – рок «Ulytau» тобы өнерлерін көрсетіп, көрерменге ерекше көңіл күй сыйлады. Олар өздерінің өнерімен халықты қуантты, өнер арқылы бірлігіміз бен мәдениетіміздің байлығын паш етті.

Бұл шара елімізде достық пен ынтымақтастықтың маңыздылығын, әрбір азаматтың қоғамға қосқан үлесінің бағаланатынын көрсетіп, Қазақстанның мәдениеті мен өнерінің дамуына бағытталған игі қадам болды.

Сонымен қатар, Халықтар достығы мен Мәдениет үйінің фойесінде Республика күніне арналған Ұлытау облысы өңірлерінің жетістіктерін айшықтайтын «Аймақ тынысы» атты көрме өтті.