Кенші-инженер, «Октябрь революциясы», «Еңбек Қызыл ту», «Құрмет белгісі», «Халықтар достығы» ордендерінің иегері, Жезқазған мен Сәтбаев қалаларының құрметті азаматы, ақын Садық Қасымұлы Асатовтың 90 жылдық мерейтойына орай Жәйремнің төрінде дүбірлі той өтті.

Облыстық мәдениет басқармасының ұйымдастыруымен өткізілген іс-шара С.Асатов атындағы шахмат пен үстел теннисі ойындарынан құралған турнирмен бастау алды. Турнирге Жәйрем жұртшылығының спорт сүйер қауымы белсене қатысып, қатысушылар кубоктармен, дипломмен және бағалы сыйлықтармен марапатталды.

Садық Қасымұлы Асатовтың 90 жылдығына орай «Алашқа әйгілі Асатов!» атты облыстық іс-шара барысында С.Асатовтың өмірі мен шығармашылығының қыр-сырын кеңінен ашатын көрме ұйымдастырылды. Көрмеге келуші жұртшылықтың назарына Садық Қасымұлы Асатовтың қызы Гаухар Асатова әкесі жайлы толыққанды ақпарат ұсынып, халықтың ілтипатына бөленді.

Тұлғаға тақырыбы сай айтулы іс-шара басында С.Қожамқұлов атындағы қазақ сазды-драма театрының әртістері Садық Асатовтың еңбек жолынан үзінді көрсетіп, Садық Қасымұлының ақындық талантын айқындайтын авторлық өлең шумақтарын көрермен назарына жеткізді. Іс-шара
Т.Қалмағамбетов атындағы облыстық филармониясының және Жәйрем мәдени-сауық орталығы өнерпаздарының әуезді әндерімен ұласып, көрерменнің құлақ құрышын қандырды. Садық Асатовтың 90 жылдық еске алу кешіне облыс әкімі Берік Әбдіғалиұлы қатысып, Жайрем жұртшылығына жүрекжарды лебізін білдірді. Еске алу кешінің тізгінін Төрегелді Еркебұланұлы мен Раушан Құрмашқызы қолға алып, іс-шараға арнайы шақырылған республика көлеміндегі танымал тұлғаларға Садық Асатов жайлы естелік сөз кезектерін ұсынды және ақынның өлендерін оқып жиналған халыққа жақсы әсер қалдырды. Кеш соңында Садық Асатовтың қызы Гаухар Асатова балалық естеліктерімен бөлісіп, ұйымдастырушылар мен Жайрем еліне ризашылығын білдірді.

Алашқа әйгілі тұлға — Садық Қасымұлы Асатовтың 90 жылдығына орай ұйымдастырылған іс-шара құдайы аспен жалғасын тапты.
Садық Қасымұлының көзін көрген, сыйлас, дәмдес болған ағайын-туыстарының, дос-жарандары мен еңбегіне бас иер қауымның қатысуымен берілген құдайы аста облыстық мәдениет басқармасы мен Қаражал, Жәйрем әкімдіктері атынан бірқатар құрметті меймандарға қазақи дәстүрмен шапан жабылды. Асқа қатысушы қонақтар Садық Қасымұлының елеулі еңбегі мен шабытты шығармашылығы жайлы көптеген естеліктер айтып, ұрпағына игілікке толы тілек-лебіздерін білдірді.