2024 жылдың 1-3 маусым күндері Ұлытау облысының мәдениет, тілдердерді дамыту және архив ісі басқармасының «Облыстық мәдени — сауық және шығармашылық ғылыми-әдістемелік орталығы» КМҚН-ның ұйымдастыруымен Халық шығармашылығының Республикалық ХХХІІ «Ұлытау үні» фестивалі өтті.

Жезқазған қаласының халықтар достығы мен мәдениеті үйінде халық шығармашылығының Республикалық ХХХІІ дәстүрлі «Ұлытау үні» фестивалінің ашылу салтанаты өтті. Фестиваль Қостанай мен Ұлытау облысы өнерпаздары арасындағы Республикалық ақындар айтысымен ұласты. Командааралық айтыс бұл өнердің барлық жанрлық түрлерін қамтыды, атап айтқанда: сүре айтыс, түре айтыс, қайым айтыс, қыз бен жігіт айтысы халық арасында кеңінен насихатталды.
Атап айтар болсақ:
Сүре айтыс – Төлеген Жаманов пен Айбек Қалиев; Түре айтыс – Сырым Нығызбай мен Айбар Рағатов; Қайым айтыс – Думан Самат пен Батырлан Сағынтай; Қыз-жігіт айтысы – Өміржан Көпбосын мен Жібек Шахмардан;
Екі облыс арасындағы тартысты байқау айтыс өнерімен ғана шектелмей, дәстүрлі әншілер мен күйшілер сайысы, жыршы-термешілер сайысымен араласып, байқау көркін одан әрі қыздыра түсті.
Дәстүрлі ән бойынша Ардақ Мұқышев пен Манапбек Кәдіров сайысқа түссе, күй шерткен Бекзада Достиярова мен Данияр Рысбеков, жыр айтқан Сағынбай Мәлібеков пен Абзал Алпыс, термемен тебіренткен Жалын Сыздықов пен Қалдыбек Қиысқан болды.
Команданы таныстырушы, жас ақын – Өміржан Хайрурраұлы.
Ал, айтысқа қазылық еткен еліміздегі айтыс өнерін қара нардай өрге сүйреп келе жатқан ақын, Қазақстанның еңбек сіңірген қайраткері, «Құрмет», «Отан» ордендерінің иегері, Халықаралық айтыс ақындары мен жыршы-термешілер одағының төрағасы, Ұлытау облысының құрметті азаматы — Жүрсін Ерман ағамыз болды.
Айтысты жүргізген – аталмыш өнердің белгілі ақтаңгері, Қазақстанның еңбек сіңірген қайраткері, фольклортанушы ғалым, филология ғылымдарының докторы, профессор Аманжол Әлтай. Қазылар алқасының шешімімен ұпай саны 192 де 193 болып, командалық айтыстың келесі кезеңіне Қостанай облысы жолдама алды. Айта кетейік, командалық айтыс ел көлемінде өтуде.
Нәтижесінде, күйші, жыршы, термешілерге 250 мың теңгеден, ақындарға 500 мың теңгеден қаржылай сыйақылардың сертификаттары берілді.