ХХХІІІ «Ұлытау үні – 2025» республикалық фестивалі өз мәресіне жетті
2025 жылы Ұлытау облысында Республикалық халық шығармашылығының ХХХІІІ «Ұлытау үні – 2025» фестивалі жоғары деңгейде ұйымдастырылып, табысты өтті. Фестиваль аясында бірқатар республикалық байқаулар мен мәдени шаралар өткізілді.
Нұрғиса Тілендиевтің 100 жылдығына арналған «Мультиаспапшылар» республикалық байқауы өтіп, еліміздің өңірлерінен келген дарынды өнерпаздар өзара бақ сынады. Байқау қорытындысы бойынша бас жүлдені Ұлытау облысының өкілі Санджай Альмишев иеленді.
Сондай-ақ сазгер-күйші Кетбұқа жыраудың 840 жылдығына арналған күйшілер байқауы ұйымдастырылып, қатысушылар ұлттық күй өнерінің үздік үлгілерін ұсынды. Байқау нәтижесінде бас жүлде Астана қаласынан Қасымова Айшолпанға бұйырды.
Шәмші Қалдаяқовтың 95 жылдығына арналған вокалдық байқау да фестивальдің маңызды бөліктерінің бірі болды. Бұл байқауда Қарағанды облысының өкілі Саутхан Фарида бас жүлдеге ие болды.
Фестиваль аясында «Ұлт ұясы – Ұлытау» атты республикалық ақындар айтысы өтіп, еліміздің әр өңірінен келген 12 ақын сөз сайысына түсті. Айтыс қорытындысы бойынша бас жүлдені Абай облысынан Рүстем Қайыртай жеңіп алды.
23 тамыз күні фестиваль Ротонда сахнасындағы салтанатты гала-концертпен қорытындыланды. Гала-концертте Ұлытау облыстық филармониясының өнерпаздары, сондай-ақ танымал эстрада жұлдыздары Тамара Асар, Мөлдір Әуелбекова және Ұшқын Жамалбек өнер көрсетті.
«Ұлытау үні – 2025» фестивалі ұлттық өнерді насихаттауға, шығармашылық жастарды қолдауға және қазақ мәдениетінің рухани құндылықтарын дәріптеуге зор үлес қосты.