Ағымдағы жылдың 29-маусым күні облыстық ғылыми-әдістемелік орталығының ұйымдастыруымен Ұлытаудың «Шыңғыс» алаңында «Көкмайса — ұлттық тағамдар мен салт-дәстүрлер» фестивалі өтті. Бағдарламада 7 киіз үйде фестивальдің тақырыбын кеңінен ашқан көрме-көрсетілімі безендіріліп, келуші меймандар құмыра жасау шеберлерінің (гончар), ағаш және этноәшекей шеберлерінің, қолөнер және этнокиім шеберлерінің шеберлік сыныптарына қатысып, көне жәдігерлер көрмесін тамашалады.
Салтанатты ашылу рәсімін облыс әкімінің міндетін атқарушы Алмаз Серікболсынұлы мен «Көкмайса» фестивалінің авторы Бахтияр Қожахметов ізгі тілектерімен бастап, одан әрі көпшілік «Қазық қағу», «Желі тарту», «Бие байлау», «Күбі ыстау», «Қымыз ашыту» рәсімдерінің қыр-сырымен танысу мүмкіндігіне ие болды.
Спорттық ойындардың 7 түрінен ұйымдастырылған сайыстарға республика бойынша 100ге жуық спортшылар қатысып, сынға түсті.
Сондай-ақ, өнер сүйер қауымның назарына Т.Қалмағамбетов атындағы облыстық филармония әртістерінің концерттік бағдарламасы ұсынылды. Фестивальдің көркін қыздырған «Асау үйрету» рәсімі де назардан тыс қалмады. Шара соңында спорттық ойындар жеңімпаздары қаржылай сертификаттармен марапатталып, жиналған қауым жоғары көңіл-күймен тарқасты.