5-ші Дүниежүзілік көшпенділер ойындары 2024 жылы 8-13 қыркүйек аралығында Астана қаласында өтті. 6 қыркүйектен бастау алған қазақ даласындағы дүбірлі той баршамыз үшін тарихта алтын әріппен таңбаланған әсерлі оқиғаға айналды.
30-ға жуық мемлекет өкілдерінің басын қосқан бұл атаулы сәттің куәгері болу Ұлытау облысына да бұйыруы — күні кеше тұсауын кескен жаңа облыс үшін зор мәртебе болды.
Облыстың үздік өнерпаздары ұлан асыр дүбірлі тойға 10 қыркүйек күні елорданың төрінде әнмен әрленіп, күймен көмкерілген «Хан ордадан Ақ ордаға сәлем!» атты ән шашуын көпшілік назарына паш етті.
Облысымыздан түлеп ұшқан эстрада жұлдыздары, оның ішінде этно-рок «Ұлытау» тобы форматының авторы, Англия королевасының «Алтын орденінің» иегері, ҚР Еңбек сіңірген қайраткері, Ұлытаудың ұлы Қыдырәлі Болман, өнер жұлдызы, Қазақстанның еңбек сіңірген қайраткері Қарақат Әбілдина, тұңғыш бард-әнші, Қазақстанның еңбек сіңірген қайраткері Қорабай Есенов, Қазақстанның еңбек сіңірген артисі Серік Оспан және «Шабыт» халықаралық фестивалінің бас жүлдегері Жібек Мұсырғалиева туған жердің шашбауын көтеріп, өнерсүйер қауымға әннен шабытты шашу шашты. Облыс өнерпаздарының мәдени бағдарламасын көшпенділер ойындарын тамашалауға келген дүйім жұрт тамашалап, оның ішінде өзге ұлт өкілдерінің халқымыздың мәдениеті мен өнеріне тәнті болуы — көңілге қуаныш сыйлады. Ұйымдастыру алқасына және белесті бастаманы қолдаған ел Президетіне алғысымыз шексіз!
Қазақ елінің маңдайындағы бағы еселеніп, жұлдызы жарқырай түссін!