Ұлытау облысының орталығында Наурыз мейрамы кең көлемде аталып өтті

Ұлытау облысының орталығында Ұлыстың ұлы күні – Наурыз мейрамы ерекше сән-салтанатпен атап өтілді. Мерекелік шараға облыс тұрғындары мен қонақтары көптеп жиналып, қазақ халқының ұлттық дәстүрлері мен салт-санасын ұлықтауға айрықша мән берілді.
Іс-шара барысында Ұлытау облысының әкімі Дастан Рыспеков жұртшылықты Ұлыстың ұлы күнімен құттықтап, ақжарма тілегін жеткізді. Өңір басшысы Наурыз мейрамының ел бірлігі мен татулығын нығайтудағы маңызын атап өтіп, «Наурызнама» онкүндігінің мазмұндық әрі тәрбиелік мәніне тоқталды.
Мереке аясында тұрғындарға қазақстандық эстраданың танымал «Made in KZ» және «Тұран» топтары, сондай-ақ Тайжан Қалмағанбетов атындағы облыстық филармония өнерпаздары концерттік бағдарлама ұсынды. Сонымен қатар ұлттық спорт түрлерінен жарыстар, асқа бата беру және қазақтың ұлттық тағамдары бойынша сайыстар ұйымдастырылып, қатысушылар өзара бақ сынады.
Наурыз мейрамы қарсаңында Ұлытау облысы бойынша 90-ға жуық киіз үй тігілді. Оның 22-сі Жезқазған қаласында орнатылды. Киіз үйлер ұлттық дәстүрді насихаттаумен қатар, безендірілуі, мерекелік атмосферасы және ұлттық тағамдарды ұсынуы бойынша өзара сайысқа түсіп, үздіктер анықталды. Нәтижесінде Ұлытау облысы денсаулық сақтау басқармасының киіз үйі бірінші орынды иеленсе, Жаңаарқа ауданы екінші орынға, Сәтбаев және Қаражал қалаларының киіз үйлері үшінші орынға лайық деп танылды.
2025 жылдың 22 наурыз күні сағат 10.00-де «Қазақтың ұлттық тағамы және асқа бата беру» сайысы ұйымдастырылып, халқымыздың бай рухани және мәдени мұрасы кеңінен дәріптелді. Аталған сайыс қорытындысы бойынша бірінші орын «Жетісу» құрылыс компаниясына бұйырып, 300 000 теңге көлемінде ақшалай сыйлық табысталды. Екінші орынды Ұлытау облысының жұмыспен қамту және әлеуметтік бағдарламалар басқармасы иеленіп, 200 000 теңге, ал үшінші орынға Жастар ресурстық орталығы лайық деп танылып, 150 000 теңге сыйақы берілді.
Биылғы Наурыз мейрамы Ұлытау өңірінде ұлттық бірлік пен татулықты нығайтып, салт-дәстүрді дәріптеуге және халықты ортақ құндылықтар төңірегіне топтастыруға зор үлес қосты.