Ұлытау облысында ақ әжелер ансамбльдерінің І облыстық фестиваль-байқауы өтті
2025 жылғы 3 мамыр күні Жезқазған қаласындағы Халықтар достығы мен мәдениет үйінде Ұлытау облысы әкімдігінің қолдауымен ақ әжелер ансамбльдерінің І облыстық фестиваль-байқауы өтті.
Фестиваль-байқаудың басты мақсаты ұлттық мәдениет пен салт-дәстүрді насихаттау, ұрпақтар сабақтастығын нығайту, сондай-ақ өнерлі әжелердің шығармашылығына қолдау көрсету болды. Аталған мәдени шараға Ұлытау облысының барлық аудандарынан келген әжелер ансамбльдері қатысып, өз өнерлерін ортаға салды.
Фестивальдің ашылу салтанатында Ұлытау облысы әкімінің орынбасары Зина Жұманазарқызы Ақылбекова құттықтау сөз сөйлеп, қатысушыларға сәттілік тіледі. Ол өз сөзінде ұлттық дәстүр мен мәдениетті сақтаудың ұлт болашағы үшін маңыздылығын атап өтіп, мұндай шаралардың рухани-тәрбиелік мәніне ерекше тоқталды.
Байқау қорытындысы бойынша бірінші орын Ұлытау ауданының әжелер ансамбліне бұйырды. Екінші орынды Жаңаарқа ауданының өнерпаздары иеленсе, үшінші орын Жезқазған қаласының ақ әжелер ансамбліне табысталды. Сонымен қатар, белсенділігімен және өнерімен көзге түскен Кеңгір, Талап ауылдары, Жәйрем кенті мен Сәтбаев қаласының ансамбльдері ынталандыру сыйлықтарымен марапатталды.
Фестиваль концерттік бағдарламамен жалғасып, көрермендерге ұлттық әндер мен билер, театрландырылған қойылымдар ұсынылды. Қатысушылардың барлығы жоғары деңгейде өнер көрсетіп, қазақ халқының бай мәдени мұрасын кеңінен дәріптеді.