Ұлытау ауданында «Көкмайса – ұлттық тағамдар мен салт-дәстүрлер» фестивалі өтті
2025 жылғы 20 маусым күні Ұлытау ауданының тау бөктерінде орналасқан «Болат сай» аумағында «Көкмайса – ұлттық тағамдар мен салт-дәстүрлер» фестивалі ұйымдастырылды.
Фестиваль аясында 7 киіз үй тігіліп, ұлттық тағамдар мен салт-дәстүрлерді кеңінен танытатын көрме-көрсетілімдер безендірілді. Келуші қонақтар қолөнер шеберлерінің шеберлік сыныптарына қатысып, көне жәдігерлер көрмесін тамашалады. Сонымен қатар «Қазық қағу», «Желі тарту», «Бие байлау», «Күбі ыстау», «Қымыз ашыту» сынды ұлттық рәсімдердің мазмұны мен ерекшеліктерімен танысу мүмкіндігіне ие болды.
Фестиваль барысында спорттық ойындардың 9 түрінен сайыстар ұйымдастырылып, республика бойынша 100-ге жуық спортшы өзара сынға түсті.
Концерттік бағдарламада жергілікті өнерпаздар, Қазақстанға танымал «Жошы» этно-фольклорлық ансамблі, сондай-ақ Қазақстанның еңбек сіңірген қайраткері, «Дарын» мемлекеттік жастар сыйлығының иегері, эстрадалық әнші Досымжан Таңатаров өнер көрсетті.
Іс-шара соңында спорттық ойындарда жеңіске жеткен қатысушылар қаржылай сертификаттармен марапатталып, жиналған қауым көтеріңкі көңіл-күймен тарқасты.